Месси ЖЧ тарихидаги энг яхши тўпурарга айланди

Тошкент, Ўзбекистон (UzDaily.uz) — Аргентина терма жамоаси сардори ва ҳужумчиси Лионель Месси жаҳон футболи тарихидан ўзига муносиб ўрин эгаллаб, жаҳон чемпионатлари тарихидаги мутлақ тўпурарлик рекордини ўрнатди.

ЖЧ-2026 гуруҳ босқичининг иккинчи турида Австрия миллий жамоасига қарши кечган баҳсда 38 ёшли форвард учрашувнинг 38-дақиқасида ҳисобни очди. Ушбу гол аргентиналик футболчи учун жаҳон чемпионатларидаги 17-гол бўлиб, унга 2014 йилдан буён мазкур рейтингда пешқадам бўлиб келган афсонавий германиялик ҳужумчи Мирослав Клозени (16 гол) ортда қолдириш имконини берди.

Эътиборлиси, Месси шу ўйиннинг 9-дақиқасида пенальтидан фойдалана олмади ва шу тариқа жаҳон чемпионатлари тарихида амалга оширилмаган пенальтилар сони бўйича антирекордни янгилади.

Умумий голлар сони бўйича тарихий ютуқдан ташқари, Австрияга қарши баҳсдаги аниқ зарба Мессига жаҳон чемпионатларидаги голли сериясини олтита ўйингача узайтириш имконини берди. Бу мусобақа рекордининг такрорланиши ҳисобланади. Аргентиналик ҳужумчининг мазкур серияси Қатарда бўлиб ўтган ва Аргентина ғалабаси билан якунланган ЖЧ-2022нинг 1/8 финал босқичидан бошланган.

Бунга қадар жаҳон чемпионатларида кетма-кет олтита ўйинда гол уришга фақат икки нафар футболчи муваффақ бўлган эди: 1958 йилда француз Жюст Фонтен ва 1970 йилда бразилиялик Жаирзиньо. Бироқ уларнинг ҳар иккиси ҳам бу натижани бир мусобақа доирасида қайд этган.

АҚШ, Канада ва Мексика мезбонлик қилаётган ЖЧ-2026да Лионель Месси айни пайтда тўпурарлар пойгасида якка пешқадам бўлиб турибди. Унинг ҳисобида тўртта гол мавжуд. Гуруҳ босқичининг биринчи турида Аргентина етакчиси Жазоир дарвозасига хет-трик расмийлаштириб, жамоасининг 3:0 ҳисобидаги ғалабасига ҳисса қўшган эди.

Эслатиб ўтамиз, саккиз карра «Олтин тўп» соҳиби Месси 2023 йилдан буён MLS лигасида «Интер Майами» клуби сафида тўп сурмоқда. У бундан аввал Франциянинг «Пари Сен-Жермен» ва Испаниянинг «Барселона» клублари шарафини ҳимоя қилган ҳамда каталонияликлар билан тўрт марта УЕФА Чемпионлар лигасида ғолиб чиққан.

Аргентина миллий жамоаси сафида Месси жаҳон чемпиони (2022), Олимпия чемпиони (2008) бўлган, шунингдек, икки марта Америка кубогини (2021, 2024) қўлга киритган. Илк бор 48 та жамоа иштирокида ўтаётган жорий жаҳон чемпионати 19 июль куни якунланади.