Месси Аргентина терма жамоасидан кетишини эълон қилди
Тошкент, Ўзбекистон (UzDaily.uz) — Саккиз карра «Олтин тўп» соҳиби Лионель Месси Аргентина терма жамоаси сафидаги фаолиятини якунлашини маълум қилди. Футболчи бу қарорни оғриқли деб атади ва миллий жамоадан кетиш учун ҳозирги пайтни муносиб вақт деб ҳисоблашини таъкидлади. Бу ҳақда Месси ўзининг Instagram саҳифасида маълум қилди.
«Узоқ ўйлаб, барчага шуни айтмоқчиманки, миллий терма жамоадан кетяпман. Бу оғриқли қарор бўлди ва у ҳали ҳам қалбимнинг тубида оғриқ сифатида акс-садо бермоқда, аммо ҳозир бунинг учун муносиб вақт эканини тушуняпман», — деб ёзди Месси.
Месси Аргентина терма жамоаси сафида 207 та учрашув ўтказиб, 125 та гол урган. Ҳар икки кўрсаткич ҳам миллий жамоа рекорди ҳисобланади. Ҳужумчи шунингдек, олтита жаҳон чемпионатида иштирок этган.
Месси 2022 йилги жаҳон чемпиони, 2014 ва 2026 йилги жаҳон чемпионатларининг икки карра кумуш медали соҳиби, 2008 йилги Олимпиада чемпиони ҳамда 2021 ва 2024 йилларда Америка кубогининг икки карра ғолиби ҳисобланади. Шунингдек, унга «Олтин тўп»ни энг кўп марта қўлга киритган футболчи рекорди тегишли.
Месси 2023 йилдан буён АҚШнинг Олий футбол лигаси (MLS) клуби «Интер Майами»да тўп тепмоқда. Шимолий Америка чемпионатига ўтишидан олдин аргентиналик футболчи Испаниянинг «Барселона»си ва Франциянинг «ПСЖ» клубларида ўйнаган. «Барселона» таркибида у Чемпионлар лигасида тўрт марта ғолиб бўлган, шунингдек, УЕФА Суперкубоги ва клублар ўртасидаги жаҳон чемпионатида уч мартадан ғолиб чиққан.
Месси аввал ҳам терма жамоадан кетишини эълон қилган эди. 2016 йилда Америка кубоги финалида Аргентина Чилига мағлуб бўлганидан сўнг футболчи миллий жамоа сафидаги фаолиятини якунлашини билдирган, бироқ икки ой ўтиб терма жамоага қайтган.
Маълум қилинишича, Месси миллий терма жамоадаги фаолиятини якунлаш ҳақидаги мактубни 21 июль куни ёзган, аммо уни фақат ҳозир эълон қилган.
Футболчининг Аргентина терма жамоасидан кетишига бағишланган публикацияси биринчи соат ичида 2,4 миллионта «лайк» тўплади.
