Мбаппе 2026 йилги Жаҳон чемпионатининг энг яхши тўпурари бўлди

Тошкент, Ўзбекистон (UzDaily.uz) — Франция терма жамоаси сардори Килиан Мбаппе АҚШ, Мексика ва Канадада бўлиб ўтган 2026 йилги футбол бўйича Жаҳон чемпионатининг энг яхши тўпурари сифатида «Олтин бутса» соҳиби бўлди.

Франциялик ҳужумчи турнир давомида 10 та гол урди ва 2022 ҳамда 2026 йилги Жаҳон чемпионатларида кетма-кет энг яхши тўпурар бўлган тарихдаги биринчи футболчига айланди. Шунингдек, Мбаппе 1970 йилдан буён битта Жаҳон чемпионатида 10 та гол урган илк футболчи бўлди. Ўшанда бундай натижага германиялик Герд Мюллер эришган эди. Жаҳон чемпионатлари рекорди ҳамон 1958 йилги турнирда 13 та гол урган франциялик Жюст Фонтенга тегишли бўлиб қолмоқда.

«Кумуш бутса» Аргентина терма жамоаси сардори Лионель Мессига насиб этди. У турнирда саккизта гол муаллифи бўлди. «Бронза бутса» эса еттитадан гол урган англиялик Жуд Беллингем ва норвегиялик Эрлинг Холандга топширилди.

Жаҳон чемпионатининг энг яхши футболчиси сифатида Испания терма жамоаси сардори Родри эътироф этилди. Ярим ҳимоячи финалда Испаниянинг Аргентинани 1:0 ҳисобида мағлуб этганидан кейин «Олтин тўп» мукофотини қўлга киритди.

Жаҳон чемпионатининг энг яхши дарвозабони деб Испания терма жамоаси посбони Унаи Симон топилди.

Чемпионатнинг энг яхши ёш футболчиси мукофоти Испания терма жамоасининг 19 ёшли ҳимоячиси Пау Кубарсига топширилди. Ушбу мукофот 21 ёшдан ошмаган футболчиларга берилади ва 2006 йилги Жаҳон чемпионатидан буён топшириб келинмоқда.

Жаҳон чемпионати 11 июндан 19 июлгача бўлиб ўтди. Турнир тарихда илк бор 48 та терма жамоа иштирокида ташкил этилди ва биринчи марта бир вақтнинг ўзида уч мамлакат — АҚШ, Мексика ва Канада ҳудудида ўтказилди.