Киевда 13 нафар ўзбекистонликнинг эксплуатация қилиниши бўйича жиноят иши қўзғатилди

Тошкент, Ўзбекистон (UzDaily.uz) — Украинадаги Ўзбекистон Республикаси элчихонаси Киев вилоятидаги бир иссиқхонада 13 нафар Ўзбекистон фуқаросининг гўё эксплуатация қилингани ҳақида украин ОАВда тарқалган хабарлар юзасидан аралашгани ҳақида маълум қилди.

Элчихона хабарига кўра, ходимлар тезкор тарзда воқеа жойига етиб бориб, барча фуқароларнинг соғлиғини текширди ва уларни тиббий кўрикдан ўтказиш ҳамда зарур даволаш учун Киев вилоятидаги маҳаллий шифохоналардан бирига жойлаштирди.

Элчихона вазиятни тўлиқ назоратга олди ва ўзбекистонликларни Ватанга қайтариш бўйича чоралар кўрмоқда. Консуллик ва ҳуқуқий ёрдам кўрсатиш учун Украина Ташқи ишлар вазирлиги ҳамда Бош прокурор офисига тегишли ноталар йўлланди. Ҳодиса юзасидан жиноят иши қўзғатилган, гумондорлар суд ҳукми остида турибди.

Ўзбекистон фуқароларининг ҳуқуқ ва манфаатларини ҳимоя қилиш, уларга ҳар томонлама ёрдам кўрсатиш ҳамда қонуний ҳуқуқларини тиклаш бўйича ишлар олиб борилмоқда.

Шу билан бирга, элчихона ўзбекистонликларга вазият барқарорлашгунига қадар Украинага саёҳатдан тийилишни тавсия этди.