Каннаваро: Ўзбекистон терма жамоасининг ўйини яхшиланди
Тошкент, Ўзбекистон (UzDaily.uz) — Ўзбекистон миллий футбол терма жамоаси бош мураббийи Фабио Каннаваро тайинланганидан буён жамоанинг ўйин сифати яхшиланганини маълум қилди. Бу ҳақда италиялик мутахассис матбуот анжуманида гапирди.
«Мен келганимдан бери миллий терма жамоанинг ўйини яхшиландими? Менинг жавобим — ҳа», — деди Каннаваро.
Унинг сўзларига кўра, хорижлик мураббий келганидан сўнг дарҳол натижа кутиш тўғри эмас.
«Терма жамоага хорижлик мураббий келса, эртаси куниёқ у “Барселона”дек ўйнашини кутиш нотўғри. Муаммо кутилмаларда», — деди у.
Конго Демократик Республикаси терма жамоасига қарши ўртоқлик учрашувига тўхталган Каннаваро биринчи бўлимда жамоа сифатли ўйин кўрсатганини, аммо танаффусдан кейин ўйин ўзгариб кетганини таъкидлади.
«Конго Демократик Республикасига қарши ўйиннинг биринчи бўлимида Ўзбекистон яхши ўйнади. Иккинчи бўлимда эса биз бошқача ўйнай бошладик. Бу қўрқув туфайлими ёки бошқа сабабданми, билмайман», — деди бош мураббий.
Каннаваро яна бир бор унинг йиллик маоши 4 миллион евро экани ҳақидаги хабарларни рад этди.
«Менинг йиллик маошим 4 миллион евро эмас. Ҳа, бу маълумот тез-тез тарқатилади, аммо бу ёлғон», — дея таъкидлади у.
Шунингдек, мутахассис ўйинлар давомида футболчилар ўртасида мулоқот етишмаслигига ҳам эътибор қаратди.
«Ўзбекистонлик футболчиларнинг муаммоларидан бири — улар деярли бир-бири билан мулоқот қилмайди. Илк бор ўйин вақтида футболчилар ўртасида умуман мулоқот бўлмаётганини кўриб ҳайратда қолдим. Биз шу жиҳатни ҳам яхшилашга ҳаракат қилдик», — деди Каннаваро.
