Жанубий Кореянинг BOMI Engineering Фарғонада лойиҳаларни режалаштирмоқда

Тошкент, Ўзбекистон (UzDaily.uz) — Фарғона вилояти ҳокими Хайрулло Бозоров Жанубий Кореянинг йирик қурилиш компанияларидан бири — “BOMI Engineering Construction” компанияси директори Канг Чангхунни қабул қилди.

Учрашувда қурилиш соҳасида ўзаро ҳамкорликни йўлга қўйиш ва истиқболли инвестиция лойиҳаларини амалга ошириш масалалари муҳокама қилинди.

Компания раҳбари Фарғона шаҳрида корейс услубида замонавий йирик комплекслар барпо этиш режалари хусусида сўз юритди ҳамда ўзаро манфаатли лойиҳаларда иштирок этишдан мамнун эканини  таъкидлади. 

Вилоят ҳокими Ўзбекистон ва Корея ўртасидаги ҳамкорлик янги босқичга кўтарилаётганини алоҳида қайд этиб, компания ташаббусларини ҳар томонлама қўллаб-қувватлашга тайёр эканини билдирди. 

Учрашув якунида инвесторлар томонидан лойиҳаларни амалий босқичга ўтказиш ва ишларни жадаллаштириш юзасидан келишувга эришилди.