Тошкент, Ўзбекистон (UzDaily.uz) — 2026 йил 11–16 август кунлари техник сабабларга кўра Тошкент — Хива йўналишида ҳаракатланувчи «Жалолиддин Мангуберди» юқори тезликдаги электропоездларининг ҳаракат тартиби ўзгаради. Бу ҳақда «Temiryo‘lekspress» АЖ матбуот хизмати хабар берди.
Йўловчи ташувчи №752 «Тошкент Йўловчи — Хива» поезди кўрсатилган даврда амалдаги жадвал асосида «Тошкент Йўловчи» станциясидан Урганч станциясигача ҳаракатланади.
№751 «Хива — Тошкент Йўловчи» поезди ҳам 11–16 август кунлари Урганч станциясидан жўнайди.
Ўзгаришлар даврида йўловчилар учун Хива — Урганч йўналиши бўйича автобус қатнови ташкил этилади. Йўловчилар Хива станциясига соат 07:00 гача етиб келишлари лозим.
Автобус Хива станциясидан Урганч станцияси томон соат 07:10 да жўнайди.
Урганч станциясидан поездларнинг жўнаши белгиланган жадвалга мувофиқ амалга оширилади.
Йўловчиларга сафарларни режалаштиришда вақтинчалик ўзгаришларни инобатга олиш тавсия этилди.
