Тошкент, Ўзбекистон (UzDaily.uz) — Истанбулда Ўзбекистон Бош консулхонаси Бейоғлу туманида аниқланган 13 ёшли Ўзбекистон фуқаросига ёрдам кўрсатди ва 1 сентябрь куни уни онасига топширди. Бу ҳақда Ўзбекистон Республикасининг Истанбул шаҳридаги Бош консулхонаси расмий баёнотида маълум қилинди.
Консулхона маълумотига кўра, 30 август куни соат 22:30 да Бейоғлу туманидаги масжидлардан бирининг имоми дипломатик ваколатхонага қўнғироқ қилган. У Ўзбекистон фуқароси, вояга етмаган С. Ж. ҳақида хабар берган.
Бош консулхона дипломатлари зудлик билан воқеа жойига етиб бориб, ўсмирни консулхонага олиб келган. Шундан сўнг унинг яқин қариндошларини аниқлаш ва улар билан боғланиш учун зарур чоралар кўрилган.
1 сентябрь куни вояга етмаган фуқаро соғ-саломат ҳолда онасига топширилган.
Ўзбекистон Бош консулхонаси вазиятни ҳал этишда кўмаклашган Туркиянинг тегишли органлари ва мамлакат фуқароларига миннатдорлик билдирди.
