ИЛМА Winvestment Consult’ни инвестиция маслаҳатчилари реестридан чиқарди
Тошкент, Ўзбекистон (UzDaily.uz) — «Winvestment Consult» МЧЖнинг Ўзбекистон қимматли қоғозлар бозорида инвестиция маслаҳатчиси сифатидаги профессионал фаолияти 2026 йил 2 сентябрдан тўхтатилди. Ўзбекистон Республикаси Истиқболли лойиҳалар миллий агентлиги маълум қилишича, бунга компаниянинг мазкур фаолиятни ихтиёрий равишда тугатиш тўғрисидаги билдириши асос бўлган.
Фаолиятни тўхтатиш Ўзбекистон Республикасининг «Лицензиялаш, рухсат бериш ва хабардор қилиш тартиб-таомиллари тўғрисида»ги Қонунининг 44-моддаси, шунингдек, қимматли қоғозлар бозорида инвестиция маслаҳатчисининг фаолиятини бошлаш ёки тўхтатиш ҳақида ваколатли органни хабардор қилиш тартиби тўғрисидаги Низомнинг 27-бандига мувофиқ расмийлаштирилган.
Мазкур Низом Истиқболли лойиҳалар миллий агентлиги директорининг 2026 йил 7 майдаги 19-сонли буйруғи билан тасдиқланган ва 2026 йил 9 июнда 3852-сон билан давлат рўйхатидан ўтказилган.
Профессионал фаолият тўхтатилганидан сўнг, тегишли маълумот Агентликнинг расмий веб-сайтида жойлаштирилган қимматли қоғозлар бозори профессионал иштирокчиларининг электрон реестрига белгиланган тартибда киритилди.
