Ҳиндистон клиникалари Ўзбекистонда филиал очишга қизиқмоқда
Тошкент, Ўзбекистон (UzDaily.uz) — Ҳиндистоннинг йирик клиникалари, жумладан Apollo, Ўзбекистонда ўз клиникаларини очишга қизиқиш билдирди. Бу ҳақда 30 август куни соғлиқни сақлаш вазири Элдор Адилов Ҳиндистон Бош вазири Нарендра Модининг Ўзбекистонга давлат ташрифи доирасида журналистларга маълум қилди.
Вазирнинг сўзларига кўра, Ҳиндистон билан ҳамкорлик доирасида Ўзбекистонда ҳозирнинг ўзида 10 дан ортиқ лойиҳа амалга оширилмоқда. Ҳиндистон делегациясининг ташрифи давомида яна бешта истиқболли ташаббусни ишга тушириш режалаштирилган. Уларнинг аксарияти фармацевтика соҳаси, хусусан, Ўзбекистонда дори воситаларини ишлаб чиқариш ва маҳаллийлаштириш билан боғлиқ.
Янги лойиҳаларни нафақат Тошкентда, балки мамлакат ҳудудларида ҳам амалга ошириш режалаштирилмоқда. Жумладан, ташриф вақтида томонлар Андижон ва Сурхондарё вилоятларидаги айрим ташаббуслар бўйича музокаралар олиб борган.
Ҳамкорликнинг алоҳида йўналиши тиббий инфратузилмани ривожлантириш билан боғлиқ. Элдор Адилов таъкидлаганидек, Ҳиндистоннинг йирик клиникалари, жумладан Apollo, Ўзбекистонда ҳам шундай тиббий муассасалар очиш истагини билдирган.
«Ҳиндистонда Apollo ва бошқа йирик клиникалар мавжуд. Улар ҳам Ўзбекистонда шундай клиникалар очиш истагини билдиришди. Ҳозир биз ушбу йўналишда ҳам ҳамкорлик устида ишлаяпмиз», — деди Соғлиқни сақлаш вазири.
Тиббиёт соҳасида вазир Ҳиндистон билан ҳамкорликнинг асосий йўналишлари сифатида онкология ва кардиологияни қайд этди. Фармацевтика секторида онкологик дори воситаларини ишлаб чиқариш ва маҳаллийлаштириш билан шуғулланадиган Ankavel корхонасини ишга тушириш режалаштирилган.
Элдор Адилов яна бир истиқболли йўналиш сифатида протон терапиясини — онкологик касалликларни даволашнинг замонавий усулини тилга олди. Унинг сўзларига кўра, ушбу технология Ҳиндистонда аллақачон қўлланилмоқда ва Ўзбекистон режаларида ҳам назарда тутилган. Бироқ уни амалга ошириш жорий лойиҳа доирасига кирмайди.
Давлат ташрифи доирасида Аюрведа ва анъанавий тиббиётнинг бошқа турлари соҳасида ҳамкорлик қилиш тўғрисида ўзаро англашув меморандуми ҳам имзоланди.
