Гулиев Сегед шаҳрида бўлиб ўтган Жаҳон кубогида кумуш медални қўлга киритди

Тошкент, Ўзбекистон (UzDaily.uz) — Ўзбекистонлик каноэчи Артур Гулиев Венгриянинг Сегед шаҳрида ўтаётган байдарка ва каноэда эшкак эшиш бўйича Жаҳон кубоги босқичида кумуш медални қўлга киритди.

200 метр масофага финал баҳсида Гулиев 38,17 сония натижа қайд этди. Ушбу кўрсаткич унга мусобақанинг якуний протоколида иккинчи ўринни таъминлади.

Баҳс ғолиблигини нейтрал мақомда иштирок этган Сергей Свинарев 38,05 сония натижа билан қўлга киритди. Учинчи ўринни эса 38,30 сония вақт кўрсатган Испания вакили Пабло Грана эгаллади.

Артур Гулиев амалдаги жаҳон чемпиони ҳисобланади ва Ўзбекистон терма жамоасининг каноэ спринт йўналишидаги етакчи спортчиларидан бири саналади.