Германия ЖЧ-2026ни Кюрасао устидан йирик ғалаба билан бошлади

Тошкент, Ўзбекистон (UzDaily.uz) — Германия терма жамоаси футбол бўйича 2026 йилги жаҳон чемпионатида ишончли старт олиб, гуруҳ босқичининг биринчи турида Кюрасао жамоаси устидан йирик ҳисобда ғалаба қозонди.

E гуруҳи доирасида Хьюстон шаҳрида бўлиб ўтган учрашув тўрт карра жаҳон чемпионлари фойдасига 7:1 ҳисобида якунланди. Германия жамоаси сафида голларга Феликс Нмеча, Нико Шлоттербек, Жамал Мусиала, Натаниэль Браун, Дениз Ундав ҳамда дубль муаллифи бўлган Кай Ҳаверц муаллифлик қилди.

Жаҳон чемпионатининг финал босқичида илк бор иштирок этаётган Кюрасао терма жамоасининг ягона голини 21-дақиқада Ливано Комененсия киритди.

Кюрасао жамоаси бош мураббийи Дик Адвокат ҳам алоҳида эътиборга тушди. У 78 ёшида жаҳон чемпионатлари тарихидаги энг ёши улуғ мураббийга айланди.

Биринчи тур якунларига кўра, Германия ўз гуруҳида плей-офф йўлланмаси учун курашда пешқадамга чиқди. Кейинги учрашувда немислар Кот-д’Ивуар терма жамоасига қарши майдонга тушади, Кюрасао эса Эквадор билан баҳс олиб боради. Ҳар икки учрашув 20 июнь куни бўлиб ўтади.

2026 йилги жаҳон чемпионати футбол тарихида илк марта 48 та миллий терма жамоа иштирокида АҚШ, Канада ва Мексика ҳудудида ўтказилмоқда. Турнир финали 19 июль кунига белгиланган.