Гана жаҳон чемпионатини Панама устидан ғалаба билан бошлади

Тошкент, Ўзбекистон (UzDaily.uz) — Гана терма жамоаси футбол бўйича жаҳон чемпионати гуруҳ босқичининг биринчи тур учрашувида Панама терма жамоаси устидан ғалаба қозонди. Торонто шаҳрида бўлиб ўтган баҳс 1:0 ҳисобида якунланди.

Учрашувдаги ягона гол иккинчи бўлимга қўшиб берилган вақтда киритилди. Ғалаба голига қўшимча вақтнинг бешинчи дақиқасида аниқ зарба йўллаган Калеб Иренки муаллифлик қилди.

Гана жамоаси ушбу ўйинни ўзининг асосий футболчиларидан бири Томас Партисиз ўтказди. Футболчи Канада ҳукумати томонидан виза бериш рад этилгани сабабли учрашувда иштирок эта олмади. Шу билан бирга, унда АҚШ визаси расмийлаштирилган бўлиб, бу унга гуруҳ босқичининг АҚШ ҳудудида ўтадиган қолган учрашувларида иштирок этиш имконини беради.

Биринчи турдан сўнг Гана терма жамоаси уч очко жамғариб, L гуруҳида пешқадамликка чиқди. Ушбу гуруҳнинг аввалги баҳсида Англия терма жамоаси Хорватияни 4:2 ҳисобида мағлуб этган эди.

Иккинчи турда Гана терма жамоаси 23 июнь куни Англияга қарши майдонга тушади, Панама эса 24 июнга ўтар кечаси Хорватияга қарши ўйнайди.

Футбол бўйича жаҳон чемпионати АҚШ, Канада ва Мексикада бўлиб ўтмоқда. Турнир тарихида илк бор унда 48 та терма жамоа иштирок этмоқда. Мусобақа 19 июль куни якунланади. Амалдаги жаҳон чемпиони Аргентина терма жамоаси бўлиб қолмоқда.