Тошкент, Ўзбекистон (UzDaily.uz) — Фарғона вилояти ҳокими Хайрулло Бозоров Учкўприк туманида хитойлик инвестор Ван Чжаолян бошчилигидаги делегация билан учрашув ўтказиб, вилоятдаги янги инвестиция лойиҳаларини муҳокама қилди. Бу ҳақда Фарғона вилояти ҳокимлиги матбуот хизмати хабар берди.
Учрашувда асосий эътибор импорт ўрнини босиш ва юқори қўшилган қийматга эга маҳсулотлар ишлаб чиқариш соҳасидаги ташаббусларга қаратилди.
Музокаралар давомида Ўзбекистонда, жумладан, Фарғона вилоятида хорижий инвесторлар учун яратилган шароитлар Хитой бизнесининг янги ишлаб чиқариш лойиҳаларини йўлга қўйишга бўлган қизиқишини ошираётгани таъкидланди.
Хусусан, Хитой томони мисдан буюмлар ишлаб чиқаришни ташкил этиш бўйича таклифларни тақдим этди.
Хайрулло Бозоров вилоят ҳокимлиги аниқ режалар ва иқтисодий ҳисоб-китобларга асосланган истиқболли ташаббусларни ҳар томонлама қўллаб-қувватлашга тайёрлигини билдирди.
Ушбу ташаббусларнинг янги иш ўринларини яратиш ва импортга қарамликни камайтиришга қаратилгани алоҳида таъкидланди.
Учрашув якунида томонлар ҳамкорликнинг кейинги йўналишларини белгилаб, таклиф этилган лойиҳаларни амалга ошириш бўйича ишларни давом эттиришга келишиб олди.
