Тошкент, Ўзбекистон (UzDaily.uz) — Фарғона вилояти ҳокими Хайрулло Бозоров Саудия Арабистонининг Astra Industries саноат гуруҳи билан қўшма инвестиция лойиҳаларини амалга ошириш истиқболларини муҳокама қилди.
Ўзбекистон делегациясининг Саудия Арабистонига амалий ташрифи доирасида Ар-Риёд шаҳрида компаниянинг молия ва инвестициялар бўйича вице-президенти Самер Хендави билан музокаралар ўтказилди.
Учрашув давомида Фарғона вилояти вакиллари ҳудуднинг саноат ва инвестиция салоҳияти, инфратузилмаси ҳамда хорижий инвесторлар учун яратилган шарт-шароитлар ҳақида маълумот бердилар.
Astra Industries — Саудия Арабистонидаги йирик саноат гуруҳларидан бири. Компания фармацевтика, кимё саноати, полимер маҳсулотлари ва металл конструкциялар ишлаб чиқариш, шунингдек, саноат қурилиши соҳаларида фаолият юритади. Унинг таркибига ишлаб чиқаришнинг турли йўналишларига ихтисослашган корхоналар киради.
Томонлар Astra Industries компаниясининг технологик ечимлари ва тажрибасидан фойдаланган ҳолда Фарғона вилоятида лойиҳаларни амалга ошириш имкониятларини кўриб чиқдилар.
Ҳамкорликнинг истиқболли йўналишлари қаторида фармацевтика, кимё саноати, полимерлар ва қурилиш материаллари ишлаб чиқариш масалалари белгиланди.
Музокаралар якунлари бўйича томонлар ҳамкорликни ривожлантириш, истиқболли инвестиция лойиҳаларини тайёрлаш ва уларни амалий босқичга ўтказиш бўйича кейинги чора-тадбирларни белгилаб олдилар.
