Фарғона вилоятида коррупцияда гумонланган шахс ушланди

Тошкент, Ўзбекистон (UzDaily.uz) — Фарғона вилоятида С.А. исмли фуқаро Учкўприк тумани ҳокими лавозимига тайинланишига ёрдам бериш баҳонасида 210 000 доллар олишга уринишда гумон қилиниб ҳибсга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Тезкор маълумотларга кўра, С.А. фуқаро И.Д.нинг ишончига кириб, ўзини ҳакамлик судида судья ёрдамчиси сифатида таништирган. У юқори лавозимдаги танишлари ёрдамида И.Д.ни 210 минг доллар эвазига Учкўприк тумани ҳокими лавозимига тайинланишини таъминлаб беришини айтган.

Гумонланувчи 100 минг доллар нақд пулни олаётган вақтида ушланган. Тезкор тадбирда Иқтисодий жиноятларга қарши курашиш департаменти ходимлари ва бошқа ҳуқуқни муҳофаза қилувчи органлар вакиллари иштирок этган.

С.А.га нисбатан Жиноят кодексининг 168-моддаси 25-модда орқали — фирибгарликка суиқасд қилиш ҳамда 211-моддаси 28-модда орқали — пора беришда иштирок этишни назарда тутувчи моддалари билан жиноят иши қўзғатилган. Ҳозирда тергов ҳаракатлари олиб борилмоқда.

Мазкур иш фонида Коррупцияга қарши курашиш агентлиги август ойида коррупциявий жиноятларда айбдор деб топилган шахслар реестри тўғрисидаги низом лойиҳасини тақдим этган эди. Унга кўра, реестрда Ўзбекистонда коррупциявий жиноятлар учун судланган барча шахслар ҳақида маълумотлар жамланиши кутилмоқда.

Лойиҳага мувофиқ, Ички ишлар вазирлиги реестрга маълумотларни киритиши ва уларни ўчириши, шунингдек, сўровларга асосан муайян шахс реестрда мавжуд ёки мавжуд эмаслиги ҳақида маълумот тақдим этиши белгиланмоқда.

Маълумотларни судланганлик ҳолати тугаллангунга ёки олиб ташлангунга қадар сақлаш режалаштирилган.