Давлат активлари Тошкент марказидаги «ТЭС» АЖ офиси биносини сотувга қўйди

Тошкент, Ўзбекистон (UzDaily.uz) — Ўзбекистон Давлат активларини бошқариш агентлиги Тошкент шаҳрининг Чилонзор туманида жойлашган офис биносини сотувга чиқарди. Бу ҳақдаги маълумот E-auksion платформасида эълон қилинди.

Объект Бунёдкор шоҳкўчаси, 23-уй манзилида, «Мирзо Улуғбек» метро бекати яқинида ва «Бунёдкор» стадиони рўпарасида жойлашган. Ҳозирги вақтда бинода давлат компанияси — «Иссиқлик электр станциялари» акциядорлик жамияти («ТЭС» АЖ) фаолият юритмоқда.

Қўшимча қурилмалари билан бирга тўққиз қаватли бинодан иборат объектнинг умумий майдони 7 620 квадрат метрни, ер участкаси майдони эса 0,46 гектарни ташкил қилади. Объект сув таъминоти, канализация ва электр таъминоти тизимлари билан таъминланган, бироқ газ таъминоти мавжуд эмас.

Участканинг бошланғич нархи 191,53 миллиард сўм этиб белгиланган. Аукцион 2 июль куни соат 10:00 да бўлиб ўтиши режалаштирилган.

Сотув шартларига кўра, балансда сақловчи ташкилот бинодан уч йил ичида чиқиб кетиши шарт. Шу билан бирга, Янги Тошкентда маъмурий бино муддатидан олдин фойдаланишга топширилса, объект белгиланган муддатдан аввал харидорга ўтказилиши мумкинлиги назарда тутилган.

Участка 2025 йил 7 мартда қабул қилинган давлат органлари биноларини хусусийлаштириш тўғрисидаги Вазирлар Маҳкамаси қарори асосида сотувга қўйилган. Ушбу қарор матни очиқ манбаларда эълон қилинмаган.

Аввалроқ Hamkorbank Тошкент марказида жойлашган Қурилиш вазирлиги биносини 196 миллиард сўмга сотиб олгани ҳақида хабар берилган эди.

Шунингдек, ислоҳотлар доирасида 1 июлдан бошлаб Ўзбекистоннинг қатор шаҳар ва туманларида давлат органлари ягона маъмурий биноларга кўчирилиши, бўшайдиган кўчмас мулк эса аукционлар орқали сотилиши қайд этилмоқда.