British American Tobacco Ўзбекистонда ишлаб чиқаришни кенгайтирмоқда

Тошкент, Ўзбекистон (UzDaily.uz) — Бош прокуратура ҳузуридаги Иқтисодий жиноятларга қарши курашиш департаментида British American Tobacco Uzbekistan корхонаси вакиллари билан учрашув бўлиб ўтди.

Унда Департамент ҳамда Алкоголь ва тамаки бозорини тартибга солиш инспекцияси раҳбарияти, шунингдек, компания вакиллари иштирок этди.

Учрашувда компания томонидан 1 000 дан ортиқ иш ўрни яратилгани, 18 мингдан зиёд савдо нуқталари билан ҳамкорлик йўлга қўйилгани, 530 млн АҚШ доллари миқдорида инвестиция киритилгани ҳамда экспорт ҳажми 95 млн АҚШ долларига етгани қайд этилди. Шунингдек, тамаки маҳсулотларининг яширин айланмалари 22,4 фоиздан 7 фоизга тушгани таъкидланди.

Томонлар ишлаб чиқариш қувватларини модернизация қилиш, янги турдаги маҳсулотлар ишлаб чиқаришни йўлга қўйиш, экспорт географиясини кенгайтириш, маҳаллий қишлоқ хўжалиги занжири билан алоқани мустаҳкамлаш, яширин иқтисодиётни қисқартириш, ҳалол рақобат муҳитини шакллантириш ҳамда қонуний айланмани кенгайтиришга қаратилган тизимли чора-тадбирларни белгилаб олдилар.