Бельгия ва АҚШ жаҳон чемпионатининг 1/8 финалига чиқди

Тошкент, Ўзбекистон (UzDaily.uz) — АҚШ, Канада ва Мексикада ўтаётган футбол бўйича жаҳон чемпионатида Бельгия ва АҚШ терма жамоалари 1/16 финал босқичидан муваффақиятли ўтди. Энди улар чорак финалга чиқиш учун ўзаро баҳс олиб боради.

Энг драматик учрашувлардан бири Сиэтл шаҳрида Бельгия ва Сенегал ўртасида бўлиб ўтди. Асосий вақт 2:2 ҳисобида якунланди. Сенегалликлар 24-дақиқада Ҳабиб Диарра ва 51-дақиқада Исмаила Саррнинг голлари эвазига икки марта олдинга чиқишди. Белгияликлар эса ўйин охирида вазиятни қутқариб қолишди: Ромелу Лукаку 86-дақиқада гол урган бўлса, Юри Тилеманс 89-дақиқада ҳисобни тенглаштирди.

Бельгия терма жамоасига ғалабани иккинчи қўшимча бўлимнинг компенсасия қилинган бешинчи дақиқасида Тилеманс томонидан аниқ амалга оширилган пенальти келтирди. Ўн бир метрлик жарима зарбаси учрашувнинг 117-дақиқасида содир этилган қоидабузарликдан сўнг белгиланди.

Исмаила Сарр учун мазкур гол жорий жаҳон чемпионатидаги тўртинчи гол бўлди. У 1990 йилги жаҳон чемпионатида камерунлик Роже Милла ўрнатган Африка терма жамоалари футболчилари орасидаги рекордни такрорлади.

1/16 финалнинг яна бир баҳсида АҚШ терма жамоаси Сан-Францискода ўз майдонида Босния ва Герцеговина жамоасини 2:0 ҳисобида мағлуб этди. Голларга 45-дақиқада Фоларин Балоган ва 82-дақиқада Малик Тиллман муаллифлик қилди. Шу билан бирга, Балоган 64-дақиқада қўпол ўйин учун қизил карточка олиб, майдонни тарк этди.

Босния ва Герцеговина терма жамоаси сафида 40 ёшли ҳужумчи Эдин Жеко илк дақиқалардан майдонга тушди ва жаҳон чемпионати плей-офф босқичида иштирок этган тарихдаги энг ёши катта майдон футболчисига айланди.

АҚШ ва Бельгия терма жамоалари ўртасидаги 1/8 финал баҳси 6 июль куни Сиэтл шаҳрида бўлиб ўтади.

Бу йилги Жаҳон чемпионати биринчи марта учта мамлакат - Қўшма Штатлар, Канада ва Мексикадан 48 та миллий терма жамоа иштирокида ўтказилмоқда. Турнир 19 июль куни якунланади.