Абдуқодир Ҳусанов Осиёнинг энг қиммат футболчиси бўлди

Тошкент, Ўзбекистон (UzDaily.uz) — Англиянинг «Manchester City» клуби ҳимоячиси Абдуқодир Ҳусанов 3 июнь куни Transfermarkt портали томонидан эълон қилинган янгиланган бозор баҳолари натижаларига кўра Осиёнинг энг қиммат футболчисига айланди.

Манба маълумотларига кўра, ўзбекистонлик футболчининг трансфер қиймати 50 млн еврога етган. Сўнгги олти ой ичида унинг бозор баҳоси 15 млн еврога ошган.

Қайд этилишича, Ҳусанов 2025 йил январь ойидан буён «Manchester City» сафида тўп сурмоқда. У бунгача Франциянинг «RC Lens» клубида фаолият юритган ва айнан шу жамоадан Англия клубига ўтган. Футболчининг «Manchester City» билан шартномаси 2029 йил ёзигача амал қилади.

Осиёнинг энг қиммат футболчилари рейтингида иккинчи ўринни Германиянинг «Mainz 05» клуби шарафини ҳимоя қилаётган япониялик футболчи Kaishu Sano эгаллади. Унинг бозор қиймати 40 млн евро деб баҳоланган.

Учинчи ўринда Испаниянинг «Real Sociedad» клубида ўйнаётган япониялик ярим ҳимоячи Takefusa Kubo жой олди. Унинг трансфер қиймати 30 млн еврони ташкил этган.

Янгиланган маълумотлар Европа чемпионатларида тўп сураётган етакчи осиёлик футболчиларнинг бозор қиймати ўсиб бораётганини акс эттиради.