Toshkent, O’zbekiston (UzDaily.uz) — “O‘zbekneftgaz” aksiyadorlik jamiyati va Xitoyning SINTIK kompaniyasi burg‘ilash uskunalarini yetkazib berish hamda Buxoro neftni qayta ishlash zavodini modernizatsiya qilishda zamonaviy texnologiyalarni joriy etish masalalarini muhokama qildi.
Muzokaralarni o‘zbek kompaniyasi boshqaruvi raisining birinchi o‘rinbosari SINTIK delegatsiyasi bilan o‘tkazdi. Bu haqda “O‘zbekneftgaz” axborot xizmati xabar berdi.
Tomonlar hamkorlikni rivojlantirish, amalga oshirilayotgan loyihalar samaradorligini oshirish va istiqbolli yo‘nalishlardagi o‘zaro aloqalarni kengaytirish masalalarini ko‘rib chiqdi. Burg‘ilash uskunalarini o‘z vaqtida yetkazib berish bo‘yicha majburiyatlarni bajarish va avval erishilgan kelishuvlarga rioya qilishga alohida eʼtibor qaratildi.
Muhokamalarning yana bir yo‘nalishi Buxoro neftni qayta ishlash zavodida ilg‘or xorijiy texnologiyalarni qo‘llash bo‘ldi. Uchrashuv ishtirokchilari Xitoy tajribasini o‘rganish va korxonani modernizatsiya qilish jarayonlariga eng samarali texnik yechimlarni joriy etish imkoniyatlarini muhokama qildi.
Uchrashuv davomida energetika va neft-gaz sohalaridagi istiqbolli loyihalar yuzasidan ham fikr almashildi.
Tomonlar o‘zaro manfaatli asosda hamkorlikni davom ettirishga tayyor ekanliklarini bildirdi.
Muzokaralar yakunida amaldagi kelishuvlarni bajarish, loyihalarning samarali amalga oshirilishini taʼminlash va qo‘shma ishlarning amaliy natijalariga erishish zarurligi taʼkidlandi.
