Toshkent, O’zbekiston (UzDaily.uz) — Odam savdosi va xorijga noqonuniy chiqib ketishda ayblanayotgan, uzoq vaqtdan buyon xalqaro qidiruvda bo‘lgan O‘zbekiston fuqarosi M.X. Turkiyada aniqlanib, qo‘lga olindi va keyin O‘zbekistonga qaytarildi. Bu haqda O‘zbekistonning Istanbul shahridagi Bosh konsulxonasi xabar berdi.
M.X. O‘zbekiston Jinoyat kodeksining 135-moddasi (odam savdosi) va 223-moddasi (xorijga noqonuniy chiqish)da nazarda tutilgan jinoyatlarni sodir etganlikda ayblangani munosabati bilan xalqaro qidiruvga berilgan.
Tergov materiallariga ko‘ra, M.X. boshqa shaxslar bilan oldindan til biriktirgan holda, fuqarolarni aldov yo‘li bilan Qozog‘iston orqali Tailand va Turkiyaga olib chiqqan. Tergov versiyasiga ko‘ra, u xorijda ularni fohishalik bilan shug‘ullanishga jalb qilgan.
Qidiruvda bo‘lgan ayolning qayerdaligi O‘zbekiston va Turkiya vakolatli organlarining qo‘shma tezkor tadbirlari natijasida aniqlangan. Shundan so‘ng uni qo‘lga olish va belgilangan tartibda O‘zbekistonga qaytarish taʼminlangan.
Huquqni muhofaza qiluvchi organlar jinoyat sodir etish va mamlakat tashqarisida yashirinishga urinish qonunchilikka muvofiq javobgarlikdan ozod qilmasligini taʼkidlamoqda.
