Toshkent, O’zbekiston (UzDaily.uz) — O‘zbekistonda kriket bo‘yicha xalqaro musobaqalar va tematik turistik dasturlar orqali sport turizmini rivojlantirish rejalashtirilmoqda. 2026 yil 19 oktyabr kuni Turizm qo‘mitasi huzuridagi «Turistik mahsulotlarni rivojlantirish loyiha ofisi» davlat muassasasi va O‘zbekiston kriket federatsiyasi hamkorlik to‘g‘risidagi memorandumni imzoladi. Bu haqda O‘zbekiston Turizm qo‘mitasi xabar berdi.
Tomonlar har yili Uzbekistan International Cricket & Tourism Cup xalqaro turniri va Silk Road Cricket Festival turistik festivalini o‘tkazishni rejalashtirmoqda. Tashabbus xorijiy sayyohlarni jalb qilish va mamlakatning turistik salohiyatini xalqaro miqyosda targ‘ib etishga qaratilgan.
Loyiha doirasida kriket musobaqalarini O‘zbekistonning madaniy-tarixiy obidalariga tashriflar bilan birlashtiradigan turistik mahsulotlarni ishlab chiqish ko‘zda tutilgan. Sayohat yo‘nalishlariga Samarqand, Buxoro va Xiva shaharlarini kiritish rejalashtirilmoqda.
Tashkilotchilar turoperatorlar, mehmonxonalar, aviatsiya va temir yo‘l kompaniyalari, hunarmandlar hamda ko‘ngilochar majmualar bilan hamkorlikni yo‘lga qo‘yishni ham maqsad qilgan. Bu xorijiy sportchilar va muxlislarga sport tadbirlarida ishtirok etishni mamlakat bo‘ylab sayohatlar bilan birlashtiradigan kompleks xizmatlarni taklif qilish imkonini beradi.
Ushbu yo‘nalishni rivojlantirish, jumladan, kriket mashhur bo‘lgan mamlakatlardan sayyohlarni jalb etishga qaratilgan. Ular qatoriga Buyuk Britaniya, Avstraliya, Yangi Zelandiya, Janubiy Afrika, Hindiston, Pokiston, Bangladesh, Shri-Lanka va Afg‘oniston kiradi.
Tashabbus O‘zbekiston hududlariga sayyohlar oqimini ko‘paytirish, xalqaro aloqalarni kengaytirish va turizm sohasida qo‘shimcha iqtisodiy imkoniyatlar yaratishga yordam berishi kutilmoqda.
