Toshkent, O’zbekiston (UzDaily.uz) — O‘zbekiston 2031 yilda BMTning Jinoyatchilikning oldini olish va jinoiy odil sudlov bo‘yicha navbatdagi kongressini o‘tkazadi. Bu haqda O‘zbekiston Prezidenti Administratsiyasi rahbari Saida Mirziyoyeva Abu-Dabida bo‘lib o‘tayotgan 15-kongress yakunlari bo‘yicha maʼlum qildi.
Uning so‘zlariga ko‘ra, tadbirda turli mamlakatlardan qariyb 5 ming nafar vakil ishtirok etmoqda. Ishtirokchilar xalqaro hamkorlikni talab qiladigan masalalarni, jumladan, transmilliy jinoyatchilik, terrorizm, giyohvandlik vositalarining noqonuniy aylanmasi, korrupsiya va ekologik huquqbuzarliklarga qarshi kurashish masalalarini muhokama qilmoqda.
Bolalarni himoya qilish va qonun ustuvorligini mustahkamlashga ham alohida eʼtibor qaratilmoqda.
Kongress doirasida Saida Mirziyoyeva BMT Bosh kotibining o‘rinbosari, BMTning Giyohvandlik va jinoyatchilik bo‘yicha boshqarmasi (BMT GJB) ijrochi direktori Monika Juma bilan uchrashdi.
Uning taʼkidlashicha, O‘zbekiston BMT GJB bilan faol hamkorlik qilib, qo‘shma loyihalarni amalga oshirmoqda.
Saida Mirziyoyeva kongressning O‘zbekiston uchun alohida ahamiyatga ega ekanini taʼkidladi. Tadbirda ishtirok etayotgan barcha mamlakatlar navbatdagi kongressni O‘zbekistonda o‘tkazish tashabbusini qo‘llab-quvvatladi. Bu qaror kongressning yakuniy deklaratsiyasida mustahkamlandi.
U bu qarorni O‘zbekistonga, uning ochiqligi va muloqotga tayyorligiga, shuningdek, umumiy vazifalarni hal etish uchun saʼy-harakatlarni birlashtirishga bo‘lgan xalqaro ishonchning muhim belgisi deb atadi.
«Oldimizda besh yillik tayyorgarlik turibdi. 2031 yilda respublika dunyoning turli mamlakatlaridan delegatlarni qabul qiladi», — dedi Saida Mirziyoyeva.
