Toshkent, O’zbekiston (UzDaily.uz) — O‘zbekiston Prezidenti Shavkat Mirziyoyev 12 oktyabr kuni Erkinjon Turdimovning yangi tashkil etilgan Taʼlim va fan vazirligi rahbari etib tayinlanganiga izoh berdi.
Davlat rahbari Yangi Toshkentdagi uchrashuv chog‘ida universitetlar mutaxassislar tayyorlash sifatini oshirishga ko‘proq eʼtibor qaratishi kerakligini taʼkidladi. Bu haqda “Daryo” nashri xabar berdi.
«Soni ko‘paydi, sifati esa kam. Endi har bir universitet o‘zi uchun kimlarni va qanday kadrlarni tayyorlayotganini aniq belgilab olishi kerak. Men to‘rtta viloyatga hokim bo‘lgan insonni Taʼlim vazirligiga bejiz olib kelmadim», — dedi Mirziyoyev.
9 oktyabr kuni Erkinjon Turdimov Bosh vazirning birinchi o‘rinbosari — taʼlim va fan vaziri etib tayinlangan edi. Yangi lavozimga tayinlanishi munosabati bilan u 2025 yil yanvar oyidan buyon egallab kelgan Sirdaryo viloyati hokimi lavozimini tark etdi.
Turdimov avval 2008–2016 yillarda Navoiy viloyatiga, 2016 yil dekabridan Surxondaryo viloyatiga, 2018 yil iyulidan 2024 yil noyabrining oxirigacha esa Samarqand viloyatiga rahbarlik qilgan.
Taʼlim va fan vazirligi 3 oktyabr kuni Maktabgacha va maktab taʼlimi vazirligini Oliy taʼlim, fan va innovatsiyalar vazirligi bilan birlashtirish orqali tashkil etildi.
Islohot taʼlim bosqichlari o‘rtasidagi uzviylikni taʼminlash, taʼlim va ilmiy faoliyatni o‘zaro bog‘lash, yagona boshqaruv tizimini joriy etish hamda jamoatchilik oldidagi hisobdorlikni oshirishni nazarda tutadi.
Bosh vazirning birinchi o‘rinbosari — taʼlim va fan vaziri taʼlim, fan va sog‘liqni saqlash sohalaridagi vazifalar ijrosini muvofiqlashtiradi.
Tegishli vazifalarni tashkil etish va ularning bajarilishini nazorat qilish O‘zbekiston Prezidenti Administratsiyasi rahbari Saida Mirziyoyeva zimmasiga yuklatilgan.
