Янги туғилган чақалоқларнинг асосий қисми 25–39 ёшдаги ота-оналарга тўғри келади

Тошкент, Ўзбекистон (UzDaily.uz) — 2025 йил январь–июн ойларида Ўзбекистон бўйлаб ФҲДЁ органлари 405 508 та тирик туғилиш ҳолатини қайд этди, дея хабар бермоқда Миллий статистика қўмитаси.

Чақалоқларни ота-оналарнинг ёш тоифалари бўйича тақсимланишини таҳлил қилиш шуни кўрсатадики, энг кўп бола 25–39 ёшдаги аёллар томонидан дунёга келтирилган — бу тоифа жами туғруқ қилган аёлларнинг 59,9 фоизини ташкил этади.

25 ёшгача бўлган аёллар ҳиссаси 38,6 фоизни ташкил қилган бўлса, 40 ёшдан ошган оналар улуши бор-йўғи 1,5 фоиз бўлган.

Оталарга келганда, янги туғилган чақалоқларнинг асосий қисми (82,1%) 25–39 ёшдаги эркакларга тўғри келган. 25 ёшгача бўлган эркаклар 10,4 фоиз ҳолатда, 40 ёш ва ундан катта эркаклар эса 7,5 фоиз ҳолатда фарзандли бўлган.