Хитой компаниялари Ўзбекистонда фармацевтика лойиҳаларини ривожлантиришга қизиқмоқда

Тошкент, Ўзбекистон (UzDaily.uz) — Тиббиёт ва фармацевтика саноатини ривожлантириш агентлиги директори Абдулла Азизов Чжан Сюнь бошчилигидаги Хитой компаниялари вакиллари билан учрашув ўтказди. Унда Ўзбекистон ва Хитойнинг фармацевтика ҳамда тиббиёт соҳаларидаги ҳамкорлигини кенгайтириш истиқболлари муҳокама қилинди.

Томонлар қўшма лойиҳаларни амалга ошириш, инвестицияларни жалб қилиш ва ўзаро манфаатли ҳамкорликнинг янги йўналишларини кўриб чиқди.

Учрашув давомида Ўзбекистонда хорижий инвестицияларни жалб қилиш, фармацевтика саноатида янги ишлаб чиқариш қувватларини ривожлантириш ва ишлаб чиқарилаётган маҳсулотларни маҳаллийлаштириш учун шароит яратилаётгани таъкидланди.

Замонавий технологияларни жорий этиш ва фармацевтика ишлаб чиқаришининг экспорт салоҳиятини ошириш имкониятларига алоҳида эътибор қаратилди.

Томонлар вакиллари инвестициялар, ишлаб чиқариш ва технологиялар трансфери соҳаларида ҳамкорликни кенгайтириш юзасидан фикр алмашди. Муҳокама қилинган йўналишлар қаторида маҳсулотларни маҳаллийлаштириш ва корхоналарнинг халқаро бозорларга чиқиши масалалари ҳам бўлди.

Учрашув якунлари бўйича истиқболли ташаббусларни аниқ лойиҳалар асосида амалга ошириш бўйича келишувга эришилди.

Шунингдек, томонлар Ўзбекистон ва Хитой компаниялари ўртасида тиббиёт ва фармацевтика соҳаларидаги амалий ҳамкорликни давом эттиришга келишиб олди.