Uzbekistan Airways Тошкент — Тель-Авив рейсларини тиклади

Тошкент, Ўзбекистон (UzDaily.uz) — Миллий авиакомпания Uzbekistan Airways 14 апрелдан бошлаб Тошкент — Тель-Авив йўналиши бўйича мунтазам рейсларни қайта тиклади. Бу ҳақда Ўзбекистоннинг Исроилдаги элчихонаси хабар қилди.

Парвозлар ҳафтасига уч марта — душанба, сешанба ва пайшанба кунлари амалга оширилади.

Компания маълум қилишича, 3 майдан бошлаб қўшимча рейслар жорий этиш орқали парвозлар дастурини кенгайтириш режалаштирилган.

Ушбу рейслар Тошкент — Самарқанд — Тель-Авив ва қайтиш йўналиши бўйича амалга оширилади.

Аввалроқ, март ойи охирида авиакомпания Тель-Авивга рейсларни вақтинча тўхтатишга мажбур бўлган эди. Авиақатновларнинг тикланиши Ўзбекистон ва Исроил ўртасида мунтазам йўловчи ташувларини қайта йўлга қўйиш имконини беради.