Тошкентнинг икки туманида электр таъминоти тикланмоқда

Тошкент, Ўзбекистон (UzDaily.uz) — Тошкент шаҳрида 110/10/6 кВ кучланишли «Кўргазмали» подстанциясида юзага келган носозлик оқибатида жабр кўрган истеъмолчиларнинг электр таъминотини босқичма-босқич тиклаш ишлари бошланди. Бу ҳақда Ўзбекистон Энергетика вазирлиги хабар қилди.

Вазирлик маълумотларига кўра, подстанциянинг Т-2 трансформаторига кучланиш берилган. Ҳозирда мутахассислар 6 ва 10 кВ тақсимлаш қурилмаларига босқичма-босқич кучланиш бермоқда. Шундан сўнг истеъмолчиларнинг электр таъминоти тўлиқ тикланади.

Аввалроқ Энергетика вазирлиги 1 июнь куни соат 18:58 да 110 кВ кучланишли подстанцияда 6 кВ линияларини электр энергияси билан таъминловчи ускуналарда носозлик юз берганини маълум қилган эди. Ҳодиса оқибатида пойтахтнинг Шайхонтоҳур ва Олмазор туманларидаги айрим истеъмолчилар электр таъминотида вақтинчалик узилишларга дуч келган.

Вазирлик мутахассислар авария оқибатларини бартараф этиш ишларига тезкорлик билан киришганини қайд этди. Шунингдек, истеъмолчилардан етказилган ноқулайликлар учун узр сўралди.