Тошкент вилоятида Бозсу каналида икки бола ҳалок бўлди

Тошкент, Ўзбекистон (UzDaily.uz) — Тошкент вилояти Бўстонлиқ туманида 17 июнь куни Бозсу каналига тушиб кетган 8 ва 10 ёшли икки болани қидириш ишлари якунланди. Тошкент вилояти Фавқулодда вазиятлар бошқармаси маълумотига кўра, ҳар икки боланинг жасади кўп кунлик қидирув-қутқарув операцияси давомида қутқарувчилар томонидан топилган.

Фожиа «Обод» маҳалласи ҳудудида содир бўлган бўлиб, канал турар жойларга яқин жойдан оқиб ўтади. Дастлабки маълумотларга кўра, болалар эҳтиётсизлик оқибатида сувга тушиб кетган.

Қидирув-қутқарув ишлари бир неча кун давомида узлуксиз олиб борилган бўлиб, унда ғаввослар ва тезкор хизмат ходимлари иштирок этган. Биринчи боланинг жасади 21 июнь куни топилган.

Тошкент вилояти Фавқулодда вазиятлар бошқармаси маълум қилишича, иккинчи боланинг жасади 22 июнь куни соат 16:50 да ғаввос-қутқарувчилар томонидан аниқланган, шундан сўнг қидирув операцияси тугатилган.

Ҳозирда ваколатли органлар воқеанинг барча ҳолатларини ўрганмоқда.