Тошкент, Ўзбекистон (UzDaily.uz) — Сирож Бекчанов Ўзбекистон Вазирлар Маҳкамаси ҳузуридаги Атом энергияси агентлиги («Ўзатом») қошидаги «Атомчилар шаҳарчаси қурилиши дирекцияси» давлат муассасаси директори этиб тайинланди.
Тайинловга қадар Бекчанов Хоразм вилояти ҳокимининг қурилиш, тўсиқсиз муҳит яратиш, алоқа, коммунал хўжалик, экология ва ободонлаштириш масалалари бўйича ўринбосари лавозимида ишлаган.
Урганч давлат университетини тамомлаган. Кейинги йилларда Бекчанов Хоразм вилоятида турли раҳбарлик ва масъул лавозимларда ишлаган. У электр тармоқлари хўжалиги, иқтисодиёт ва ҳудудларни комплекс ривожлантириш, қурилиш, алоқа, коммунал хўжалик, экология ҳамда ободонлаштириш масалаларига масъул бўлган.
Дирекция интеграциялашган атом электр станцияси мутахассислари ва уларнинг оила аъзолари учун замонавий турар жой, ижтимоий ва инфратузилма объектларини қуришга масъул ҳисобланади. Шаҳарча Жиззах вилоятининг Фориш туманида барпо этилмоқда.
Лойиҳа атом энергетикаси соҳаси ходимлари ва уларнинг оилалари учун қулай яшаш шароитларини яратиш, шунингдек, ҳудуднинг барқарор ривожланишига кўмаклашишга қаратилган.
