Россия бош вазири Михаил Мишустин Ўзбекистонга келади

Тошкент, Ўзбекистон (UzDaily.uz) — Россия Федерацияси Ҳукумати раиси Михаил Мишустин 16 июнь куни икки кунлик ишчи ташриф билан Ўзбекистонга келади. Ташриф 16–17 июнь кунлари давом этади.

Россия ҳукумати матбуот хизмати маълумотига кўра, ташриф доирасида Михаил Мишустиннинг Ўзбекистон раҳбарияти билан музокаралари режалаштирилган. Томонлар Россия–Ўзбекистон ҳамкорлигининг савдо-иқтисодий, инвестициявий, илмий-технологик ҳамда маданий-гуманитар соҳалардаги долзарб масалаларини муҳокама қилади.

Энергетика соҳасидаги ҳамкорликка, жумладан атом тармоғига, шунингдек саноат, транспорт ва қишлоқ хўжалиги соҳаларига алоҳида эътибор қаратилади.

Маълум қилинишича, Москва ва Тошкент қатор йирик инфратузилма лойиҳаларини, аввало энергетика соҳасида амалга оширмоқда. Улар қаторига атом электр станцияси қурилиши, Россия газини етказиб бериш учун қувур инфратузилмасини ривожлантириш, шунингдек Россия электр энергиясини Ўзбекистонга етказиб бериш режалари киради.

Шунингдек, ташриф доирасида Михаил Мишустин V Тошкент халқаро инвестиция форумида иштирок этади. Ўзбекистон Президенти Шавкат Мирзиёев ташаббуси билан ўтказилаётган мазкур тадбир минтақадаги энг йирик иқтисодий майдонлардан бири ҳисобланади ва мамлакатнинг инвестиция салоҳиятини халқаро бизнес ҳамжамиятига тақдим этишга қаратилган.

Форум инвестиция келишувларини муҳокама қилиш ва имзолаш мақсадида давлат тузилмалари, инвесторлар ҳамда трансмиллий компанияларни бирлаштиради.

Шунингдек, Россия бош вазири Ўзбекистон бош вазири Абдулла Арипов билан доимий алоқада экани ва ЕОИИ ҳамда МДҲ доирасидаги қўшма тадбирларда мунтазам иштирок этиши қайд этилди.