Қозоғистонда Ўзбекистоннинг уч нафар фуқароси ҳалок бўлди

Тошкент, Ўзбекистон (UzDaily.uz) — 22 август куни эрталаб Қозоғистоннинг Қизилўрда вилоятида содир бўлган йўл-транспорт ҳодисаси оқибатида Ўзбекистоннинг уч нафар фуқароси ҳалок бўлди. Ҳодиса Nexia-2 автомобили ва КамАЗ юк автомобили иштирокида содир бўлган. Бу ҳақда Ўзбекистон Фавқулодда вазиятлар вазирлиги хабар берди.

Вазирлик маълумотига кўра, ЙТҲ соат 06:47 да Қизилўрда вилояти Бирқазан туманидаги «Қорабутак — Қизилўрда — Шимкент» KAZ06 республика аҳамиятидаги автомобиль йўлининг 1831–1836 километрлари оралиғида содир бўлган.

Ҳалок бўлганларнинг барчаси Nexia-2 автомобили салонида бўлган. Улар ҳодиса жойида вафот этган.

Ўзбекистон Фавқулодда вазиятлар вазирлиги масъул вазирлик ва идоралар билан ҳамкорликда ишчи гуруҳ тузди. Гуруҳ ҳалок бўлганларнинг жасадларини Ўзбекистонга олиб келиш ва уларнинг оила аъзоларига ёрдам кўрсатиш учун зарур чораларни кўрмоқда.

Фавқулодда вазиятлар вазирлигининг масъул ходимлари Қозоғистонлик ҳамкасблари билан доимий алоқада бўлиб турибди. Томонлар йўл-транспорт ҳодисасининг сабаблари ва ҳолатларини биргаликда аниқламоқда.