Ўзбекистонда йирик миқдордаги наркотиклар мусодара қилинди

Тошкент, Ўзбекистон (UzDaily.uz) — Ўзбекистоннинг Тошкент ва Самарқанд вилоятларида ўтказилган тезкор тадбирлар давомида йирик миқдордаги наркотик моддалар мусодара қилинди. Бу ҳақда ҳуқуқни муҳофаза қилувчи органлар матбуот хизмати хабар қилди.

Биринчи ҳолат доирасида Тошкент вилоятининг Бекoбод шаҳрида Давлат хавфсизлик хизмати ва божхона органлари ходимлари томонидан 1992 йилда туғилган фуқаро қўлга олинди. У 2025 йилдан буён контрабанда ва наркотик воситаларнинг ноқонуний муомаласи гумони билан қидирувда бўлган.

У яшаб турган ижара хонадон кўздан кечирилганда 151 грамм опий ҳамда турли жойларга, жумладан музлатгич ва вентиляция шахтасига яширилган 4 килограмм 971 грамм гашиш аниқланди. Тергов маълумотларига кўра, наркотик моддалар қўшни давлатдан ноқонуний равишда олиб кирилган. Қўлга олинган шахсга нисбатан қамоққа олиш эҳтиёт чораси қўлланилди.

Иккинчи ҳолат Самарқанд вилояти Ургут туманида қайд этилди. Давлат хавфсизлик хизмати, Чегара қўшинлари ва ички ишлар органлари ходимлари томонидан 2003 йилда туғилган икки нафар фуқаро 932 грамм гашиш ва 2,5 грамм опийни 10 минг АҚШ долларига сотишга уринган вақтда ушланди.

Ушбу ҳолат юзасидан жиноят иши қўзғатилди. Гумонланувчиларга нисбатан ҳам қамоққа олиш эҳтиёт чораси танланди. Тергов ҳаракатлари давом этмоқда.