Ўзбекистонда солиқ қонунбузарликлари учун жазолар кучайтирилди

Тошкент, Ўзбекистон (UzDaily.uz) — Ўзбекистонда солиқ қонунбузарликлари учун жазолар кучайтирилди. Президент Шавкат Мирзиёев бир қатор қонун ҳужжатларига ўзгартириш ва қўшимчалар киритган тегишли қонунни имзолади.

Жиноят кодексига киритилган ўзгартиришларга кўра, фойдани (даромадни) ёки солиқ солинадиган бошқа объектларни қасддан яширишни, камайтириб кўрсатишни, шунингдек солиқларни ёки йиғимларни тўлашдан қасддан бўйин товлашни анча миқдорда содир этиш, шундай қилмиш учун маъмурий жазо қўлланилганидан кейин рўй берган бўлса,

БҲМнинг 100 бараваридан 150 бараваригача миқдорда жарима ёки 2 йилгача ахлоқ тузатиш ишлари ёхуд 1 йилдан 3 йилгача озодликни чеклаш ёки 1 йилдан 3 йилгача озодликдан маҳрум қилиш билан жазоланиши белгиланди.

Илгари, мазкур жиноят учун БҲМнинг 15 бараваригача миқдорда жарима ёки 2 йилгача ахлоқ тузатиш ишлари билан жазоланиш белгиланган эди.

Жиноят процессуал кодексига киритилган қўшимчаларга кўра, Тадбиркорлик субъектининг жамоат ҳимоячиси сифатида иштирок этадиган вакили тушунчаси киритилди.

Унга кўра, тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ёки Савдо-саноат палатаси томонидан тайинланган вакил тадбиркорнинг фаолияти билан боғлиқ жиноят ишида суриштирув, дастлабки тергов ёки суд жараёнида тадбиркорлик талабига кўра жамоат ҳимоячиси сифатида иштирок этиши мумкин.

Бундан ташқари, Солиқ кодексига суд қарор чиқаргунига қадар терговда қўшимча ҳисобланиб ундирилган солиқ ва йиғимлар бўйича пеня ҳисобланмаслигини белгиловчи ўзгартиришлар киритилди.

Ушбу Қонун расмий эълон қилинган кундан эътиборан 3 ой ўтгач кучга киради.