Ўзбекистонда бозор хизматлари ҳажми 16,5 фоизга ошди

Тошкент, Ўзбекистон (UzDaily.uz) — 2026 йил январь–май ойларида Ўзбекистонда кўрсатилган бозор хизматлари ҳажми 533 079,2 млрд сўмни ташкил этиб, ўтган йилнинг мос даврига нисбатан реал ифодада 16,5 фоизга ўсди. Ўзбекистон Республикаси Миллий статистика қўмитаси маълумотлари дастлабки эканлигини ва тузатишлар киритилиши мумкинлигини қайд этилди.

Бозор хизматларининг энг катта улуши ҳануз Тошкент шаҳри ҳиссасига тўғри келмоқда. Пойтахт умумий ҳажмнинг 41,1 фоизини ёки 218 941,1 млрд сўмни ташкил этди, реал ўсиш индекси эса 118,6 фоизга тенг бўлди. Ҳудудлар орасида Самарқанд вилоятида 38 406,2 млрд сўм, Тошкент вилоятида 36 208,5 млрд сўм ва Фарғона вилоятида 34 756,1 млрд сўмлик хизматлар кўрсатилди. Тошкентдан ташқари энг юқори ўсиш суръатлари Навоий вилоятида 119,6 фоиз, Қорақалпоғистон Республикасида 116,9 фоиз ва Сурхондарё вилоятида 117,1 фоиз даражасида қайд этилди.

Республика бўйича аҳоли жон бошига тўғри келадиган бозор хизматлари ҳажми 13 915 минг сўмни ташкил этди. Бир йил аввал бу кўрсаткич 11 545,7 минг сўм бўлган бўлиб, реал ўсиш 14,4 фоизни ташкил қилди. Жон бошига энг юқори кўрсаткич Тошкент шаҳрида қайд этилди ва 68 698,2 минг сўмга етди. Кейинги ўринларда Навоий вилояти 11 520,3 минг сўм ва Тошкент вилояти 11 430,9 минг сўм билан жойлашди. Энг паст кўрсаткич эса Сурхондарё вилоятида кузатилиб, 5 708,7 минг сўмни ташкил қилди.

Кичик тадбиркорлик субъектлари томонидан 296 398,7 млрд сўмлик хизматлар кўрсатилди, бу умумий бозор хизматларининг 55,6 фоизига тенг. Ушбу сегментда ўсиш суръати 115,9 фоизни ташкил этди. Хизматлар таркибида кичик бизнеснинг энг юқори улуши Фарғона вилоятида 75,1 фоиз, Сурхондарё вилоятида 73,8 фоиз ва Наманган вилоятида 72,9 фоиз бўлди. Тошкент шаҳрида кичик тадбиркорлик улуши нисбатан паст — 41,2 фоизни ташкил этган бўлса-да, мутлақ ҳажм жиҳатидан мамлакатда энг юқори кўрсаткич қайд этилди ва 90 118,4 млрд сўмга етди.

Хизматлар соҳасининг ўсишига асосий ҳиссани савдо тармоғи қўшди. Унда ўсиш 14,0 фоизни ташкил этиб, умумий ўсишга 3,8 фоиз банди ҳисса қўшди. Молиявий хизматлар 24,9 фоизга ўсиб, 3,7 фоиз бандини таъминлади. Яшаш ва овқатланиш хизматлари 14,1 фоизга ўсиб, 2,4 фоиз банди, транспорт хизматлари эса 13,3 фоизга ўсиб, 2,2 фоиз банди ҳисса қўшди. Алоқа ва ахборотлаштириш хизматлари 22,2 фоизга, таълим соҳасидаги хизматлар эса 21,0 фоизга ошди.

Фаолият турлари бўйича бозор хизматлари таркибида савдо 26,6 фоиз билан етакчилик қилмоқда. Ундан кейин яшаш ва овқатланиш хизматлари 17,0 фоиз, транспорт хизматлари 16,0 фоиз ва молиявий хизматлар 15,8 фоизни ташкил этди. Миллий статистика қўмитасида таъкидланишича, 2026 йил январь–март ойларидан бошлаб савдо хизматлари ҳажмини ҳисоблаш методологиясига қайта сотиш учун мўлжалланган товар захиралари динамикасини инобатга олувчи ўзгартишлар киритилган. Бу ўзгаришлар халқаро экспертлар тавсиялари асосида амалга оширилган бўлиб, 2025 йилга оид таққослама маълумотлар ҳам шу асосда қайта ҳисобланган.

Савдо хизматлари ҳажми 141 660,3 млрд сўмга етди ва ўтган йилнинг қайта кўриб чиқилган базасига нисбатан 23 202,2 млрд сўмга ошди. Унинг таркибида чакана савдо 41,7 фоиз билан энг катта улушни эгаллади, улгуржи савдо эса 35,6 фоизни ташкил қилди.

Яшаш ва овқатланиш хизматлари ҳажми 17 353,3 млрд сўмга ошиб, 90 748,6 млрд сўмга етди. Ушбу ҳажмнинг 96,1 фоизи озиқ-овқат ва ичимликлар тақдим этиш хизматлари ҳиссасига тўғри келди. Транспорт хизматлари 85 320,5 млрд сўмни ташкил этди, шундан 52,1 фоизи ёки 44 484,2 млрд сўми автомобиль транспорти ҳиссасига тўғри келди.

Молиявий хизматлар ҳажми 20 121,7 млрд сўмга кўпайиб, 84 183,6 млрд сўмга етди. Ушбу соҳада ўсиш суръати 124,9 фоизни ташкил қилди. Алоқа ва ахборотлаштириш хизматлари ҳажми 39 024,8 млрд сўм бўлиб, унинг қарийб ярми — 46,1 фоизи компьютер дастурлаш хизматлари ҳиссасига тўғри келди.

Таълим соҳасида кўрсатилган хизматлар ҳажми 18 783,9 млрд сўмга етди. Бунинг 44,7 фоизи олий таълим хизматларига тўғри келди. Соғлиқни сақлаш соҳасидаги хизматлар ҳажми эса 9 149,0 млрд сўмни ташкил қилди.