Ўзбекистонда автомобил сотуви 91 мингтага етди

Тошкент, Ўзбекистон (UzDaily.uz) — Ўзбекистонда 2026 йил январь–март ойларида жами 91 088 та автомобиль сотилди. Бу ҳақда «Ўзавтосаноат» АЖ маълумотлари далолат беради.

Бозорда энг йирик ўйинчи сифатида UzAuto Motors қолмоқда. Компания ушбу даврда 45 881 та автомобиль сотган бўлиб, бозордаги улуши 50,4 фоизни ташкил этди ва миллий автосаноатда етакчи мавқеини сақлаб қолди.

Иккинчи ўринни Khorezm Auto эгаллаб, 26 348 та автомобиль сотди. Бу кўрсаткич бозорнинг 28,9 фоизига тенг. Учинчи ўринда эса ADM Jizzakh бўлиб, 10 886 та автомобил сотган ва 12,0 фоиз улушга эга бўлган.

Бозор иштирокчилари орасида BYD Uzbekistan Factory 7 799 та автомобил сотиб, 8,6 фоиз улушни эгаллади. Asaka Motors 96 та, SamAuto эса 78 та автомобил сотган бўлиб, ҳар бири 0,1 фоиздан улушга эга.

Брендлар кесимида Chevrolet етакчиликни сақлаб қолмоқда — ҳисобот даврида 72 229 та автомобиль сотилган. Кейинги ўринларда BYD 7 799 та ва KIA 6 684 та автомобил билан жойлашган. Шунингдек, Haval 2 181 та, Chery 2 021 та, Hyundai 96 та ва Isuzu 78 та автомобил билан бозорда иштирок этган.

Моделлар бўйича энг катта талаб Chevrolet Cobalt’га қайд этилди — 23 993 та. Кейин Chevrolet Damas 18 808 та ва Chevrolet Tracker 11 102 та автомобил билан келади.

Энг кўп сотилган моделлар қаторига шунингдек Chevrolet Onix — 10 396 та, Chevrolet Labo — 7 540 та, KIA Sonet — 5 596 та, BYD Song Plus Champion DMI — 2 838 та, BYD Yuan Up — 2 099 та, BYD Chazor — 1 716 та ва Haval M6 — 986 та автомобил кирди.