Ўзбекистонда 7 ойда 61,1 трлн сўмлик тўқимачилик маҳсулоти ишлаб чиқарилди

Тошкент, Ўзбекистон (UzDaily.uz) — Ўзбекистонда 2026 йил январь-июль ойларида йирик корхоналар томонидан 61,1 трлн сўмлик тўқимачилик маҳсулотлари ишлаб чиқарилди. Миллий статистика қўмитаси маълумотларига кўра, ишлаб чиқариш ҳажми йил давомида 17,5 фоизга ошган.

Етти ой давомида энг кўп тўқимачилик маҳсулотлари Фарғона вилоятида ишлаб чиқарилган бўлиб, кўрсаткич 8 трлн сўмни ташкил этди. Иккинчи ўринни 6,3 трлн сўмлик кўрсаткич билан Андижон вилояти эгаллади. Учинчи ўринда Қашқадарё вилояти бўлиб, бу ерда ишлаб чиқариш ҳажми 6 трлн сўмга етган.

Хоразм вилоятида йирик корхоналар томонидан 5,6 трлн сўмлик тўқимачилик маҳсулотлари ишлаб чиқарилган. Наманган вилоятида бу кўрсаткич 5,2 трлн сўмни, Бухоро вилоятида эса 4,9 трлн сўмни ташкил этган.

Самарқанд вилоятида ишлаб чиқариш ҳажми 4,6 трлн сўмга етган. Сурхондарё вилояти ва Тошкент шаҳрида эса 4 трлн сўмдан тўқимачилик маҳсулотлари ишлаб чиқарилган. Тошкент вилоятида 3,8 трлн сўмлик маҳсулот ишлаб чиқарилган.

Жиззах вилоятида тўқимачилик маҳсулотлари ишлаб чиқариш ҳажми 2,9 трлн сўмни, Қорақалпоғистон Республикасида эса 2,8 трлн сўмни ташкил этган.