Ўзбекистонда 26,5 кгдан ортиқ наркотик мусодара қилинди

Тошкент, Ўзбекистон (UzDaily.uz) — Ўзбекистоннинг Тошкент ва Наманган вилоятларида жами 26,5 килограмм наркотик воситалар мусодара қилиниб, трансмиллий жиноий гуруҳ иштирокчилари қўлга олинди. Бу ҳақда ҳуқуқни муҳофаза қилувчи органлар хабар берди.

Тошкент вилоятининг Қибрай туманида 21,5 килограмм наркотик моддаларни, жумладан гашиш, опий ва метамфетаминни сотишга уриниш вақтида трансмиллий жиноий уюшманинг икки аъзоси қўлга олинди. Наркотик воситалар дала ҳудудида яширилган ҳолда сақланган.

Тергов маълумотларига кўра, қўлга олинган шахслар Ўзбекистондаги жиноий гуруҳ ташкилотчиларидан бирининг кўрсатмаси асосида ҳаракат қилган.

Наманган вилоятининг Уйчи туманида эса дала ҳудудидаги яширин жойдан 5 килограмм гашишни олиш вақтида наркогуруҳнинг яна бир иштирокчиси — муқаддам судланган 63 ёшли эркак қўлга олинди.

Мазкур ҳолатлар юзасидан Жиноят кодексининг 273-моддаси 5-қисми билан жиноят иши қўзғатилган.