Ўзбекистон ва Тожикистон санитария назоратини кучайтирмоқда

Тошкент, Ўзбекистон (UzDaily.uz) — Ўзбекистон ва Тожикистон санитария-эпидемиологик хавфсизлик соҳасида чегаралараро ҳамкорлик лойиҳасини ишга туширди.

Лойиҳани ишга туширишга бағишланган учрашувда икки давлат санитария-эпидемиологик назорат органлари, Халқаро миграция ташкилоти, Осиё тараққиёт банки, тегишли идоралар ва халқаро экспертлар вакиллари иштирок этди.

Лойиҳа Тошкент вилояти Бекобод туманидаги «Ойбек» ва Тожикистоннинг Суғд вилоятидаги «Фотехобод» давлат чегараси орқали ўтказиш пунктлари ўртасидаги ҳамкорликни мустаҳкамлашга қаратилган.

Ташаббус доирасида секторлараро ишчи гуруҳ тузиш ва чегаралараро ахборот алмашиш механизмларини ишлаб чиқиш режалаштирилган. Шунингдек, эпидемиологик назорат тизимларини кучайтириш ҳамда юқумли касалликларнинг чегара орқали тарқалишининг олдини олиш чораларини кўриш назарда тутилган.

Лойиҳанинг алоҳида йўналиши чегараолди ҳудудларидаги аҳоли ва мобил аҳоли гуруҳларининг тиббий эҳтиёжларини ўрганишдан иборат.

Санитария-эпидемиологик осойишталик ва жамоат саломатлиги қўмитаси раиси ўринбосари Ботиржон Қурбоновнинг таъкидлашича, «Ойбек» ва «Фотехобод» чегара ўтказиш пунктлари Тошкент — Хўжанд йўналишидаги муҳим стратегик объектлар ҳисобланади.

Унинг сўзларига кўра, санитария-эпидемиологик назоратни доимий равишда кучайтириш, шунингдек, икки давлат ваколатли органлари ўртасида ҳамкорлик ва мувофиқлаштиришни ривожлантириш зарур.

Лойиҳани амалга ошириш чегараолди ҳудудлари аҳолиси саломатлигини муҳофаза қилишни кучайтириш, эҳтимолий эпидемиологик хавфларга тезкор жавоб қайтариш самарадорлигини ошириш ва Марказий Осиёда санитария-эпидемиологик хавфсизликни мустаҳкамлаш имконини бериши кутилмоқда.