Тошкент, Ўзбекистон (UzDaily.uz) — Ўзбекистон ва Швейцария иқтисодий ва молиявий ҳамкорликни кенгайтириш истиқболлари, қўшма лойиҳаларни амалга ошириш ҳамда икки томонлама ҳамкорликнинг янги йўналишларини муҳокама қилди.
Учрашув 14 октябрь куни Швейцариянинг Ўзбекистондаги элчиси Симоне Гигер ва Ўзбекистон иқтисодиёт ва молия вазирининг биринчи ўринбосари Илҳом Норқулов иштирокида бўлиб ўтди.
Томонлар иқтисодий алоқаларнинг жорий ҳолати ва ўзаро манфаатли ташаббусларни амалга ошириш имкониятларини кўриб чиқди.
Молия соҳасидаги ҳамкорликни мустаҳкамлаш ва истиқболли ҳамкорлик йўналишларини белгилашга алоҳида эътибор қаратилди.
Учрашув иштирокчилари, шунингдек, ISHONCH жамғармаси доирасида амалга оширилган ишлар натижалари ва кейинги даврга мўлжалланган режаларни муҳокама қилди. Хусусан, режалаштирилган ташаббусларни амалга оширишни жадаллаштириш, лойиҳалар самарадорлигини ошириш ва янги қўшма тадбирларни йўлга қўйиш масалалари кўриб чиқилди.
Учрашув якунларига кўра, томонлар иқтисодий ва молиявий алоқаларни янада мустаҳкамлаш, мавжуд имкониятлардан самарали фойдаланиш ҳамда аҳоли фаровонлигини оширишга қаратилган ташаббусларни илгари суришдан манфаатдор эканини тасдиқлади.
Учрашув Ўзбекистон Иқтисодиёт ва молия вазирлигининг Швейцария томони билан ҳамкорлиги доирасида бўлиб ўтди.
