Ўзбекистон ва Германия ташқи ишлар вазирлари икки томонлама муносабатларни ривожлантириш масалаларини муҳокама қилдилар

Тошкент, Ўзбекистон (UzDaily.uz) — Ўзбекистон ташқи ишлар вазири Бахтиёр Саидов Германия ташқи ишлар вазири Ёҳанн Вадефул билан телефон орқали мулоқот қилди.

Суҳбат чоғида томонлар Ўзбекистон-Германия муносабатларининг бугунги ҳолати ва истиқболларини муҳокама қилдилар, улар жадал ва барқарор ривожланиб бораётганини қайд этдилар.

Шунингдек, вазирлар бўлажак икки томонлама ва кўп томонлама тадбирлар жадвалини келишиб олдилар ҳамда сиёсий, иқтисодий ва маданий-гуманитар соҳалардаги ҳамкорликни янада кенгайтиришдан манфаатдор эканликларини таъкидладилар.

Саидов Ўзбекистон Германия билан конструктив ҳамкорликни чуқурлаштириш тарафдори эканлигини ва барча муҳим йўналишларда ҳамкорликни фаол ривожлантириш ниятини тасдиқлади.