Тошкент, Ўзбекистон (UzDaily.uz) — Ўзбекистонда Тоғ-кон саноати ва геология вазирлиги вакиллари Европа Иттифоқининг Ўзбекистондаги элчиси Тойво Клаар ҳамда WMC Group раҳбарияти билан учрашув ўтказди.
Томонлар тоғ-кон саноати ва геология соҳаларидаги ҳамкорликни ривожлантириш, шунингдек, янги лойиҳаларни амалга ошириш истиқболларини муҳокама қилди.
Учрашув 28 сентябрь куни Тоғ-кон саноати ва геология вазири ўринбосари У. Юсупов ҳамда вазирликнинг масъул ходимлари иштирокида бўлиб ўтди.
Музокараларнинг асосий мавзуларидан бири Ўзбекистон ва Европа Иттифоқи ўртасида тоғ-кон саноати ҳамда геология соҳаларидаги ҳамкорликнинг устувор йўналишлари бўлди.
Шунингдек, иштирокчилар Нидерландиянинг Ўзбекистон билан тоғ-кон саноати ва минерал ресурслар соҳасида савдо-иқтисодий ҳамкорликни ривожлантиришга қаратилган ташаббусларини кўриб чиқди.
WMC Group вакиллари компаниянинг Ўзбекистондаги фаолияти, жорий ишлари ва амалга оширилаётган лойиҳалари ҳақида маълумот берди.
Учрашув давомида томонлар кейинги ҳамкорлик истиқболлари, янги лойиҳаларни ишга тушириш имкониятлари ва ўзаро манфаатли бошқа масалаларни ҳам муҳокама қилди.
