Тошкент, Ўзбекистон (UzDaily.uz) — Ўзбекистон қишлоқ хўжалиги вазири Иброҳим Абдураҳмонов 7–8 октябрь кунлари Тошкентда ўтказилаётган халқаро тадбирларда иштирок этиш учун келган Афғонистон қишлоқ хўжалиги, ирригация ва чорвачилик вазири Атоулла Омари билан учрашди. Бу ҳақда Ўзбекистон Республикаси Қишлоқ хўжалиги вазирлиги хабар берди.
Учрашув давомида томонлар икки мамлакат ўртасида қишлоқ хўжалиги соҳасидаги ҳамкорликнинг жорий ҳолатини муҳокама қилиб, кейинги ҳамкорликнинг устувор йўналишларини белгилаб олди.
Пахтачилик, уруғчилик, боғдорчилик ва мева-сабзавотчилик йўналишларини ривожлантиришга алоҳида эътибор қаратилди. Томонлар, шунингдек, қишлоқ хўжалиги маҳсулотлари ўзаро савдосини кенгайтириш масалаларини кўриб чиқди.
Учрашув иштирокчилари кадрлар тайёрлаш масаласига ҳам алоҳида эътибор қаратди. Хусусан, талабаларни замонавий аграр билимларга ўқитиш, фермерлар ва мутахассисларнинг малакасини ошириш, шунингдек, Ўзбекистон ва Афғонистондаги ихтисослаштирилган таълим муассасалари ўртасида тажриба алмашиш масалалари муҳокама қилинди.
Томонлар мутахассислар ва фермерлар малакасини ошириш бўйича аниқ ва тизимли дастур ишлаб чиқиш мақсадга мувофиқ эканини таъкидлади.
Учрашув якунлари бўйича аграр соҳадаги ҳамкорликни янада мустаҳкамлаш, янги ташаббуслар ва амалий лойиҳаларни амалга ошириш, шунингдек, икки мамлакат ўртасида тажриба алмашиш механизмларини кенгайтириш муҳимлиги қайд этилди.
