Тошкент, Ўзбекистон (UzDaily.uz) — Ўзбекистоннинг 15 ёшгача бўлган футболчилардан иборат ўсмирлар терма жамоаси Бокуда ўтказилаётган FIFA U-15 World Cup & Festival 2026 мусобақасининг гуруҳ босқичини иккинчи ўринда якунлади. Энди жамоа B даражасидаги турнир ғолиблиги учун кураш олиб боради. Ўзбекистон терма жамоаси кейинги учрашувини 28 октябрь куни Гватемала терма жамоасига қарши ўтказади. Бу ҳақда Ўзбекистон футбол ассоциацияси хабар берди.
Мусобақа регламентига кўра, гуруҳ босқичидан кейин жамоалар A, B, C, D, E ва F даражаларида иштирокини давом эттиради. Ҳар бир даражада алоҳида ғолиб аниқланади. A даражаси ғолиби эса мусобақанинг умумий чемпиони бўлади.
W гуруҳида Ўзбекистон терма жамоаси бешта учрашувнинг тўрттасида ғалаба қозонди. Жамоа Багама ороллари терма жамоасини 6:1, Қозоғистон терма жамоасини эса 2:0 ҳисобида мағлуб этди. Гана терма жамоасига қарши учрашувда Ўзбекистон футболчилари 1:4 ҳисобида мағлуб бўлди. Гуамга қарши баҳсда ўзбекистонлик футболчилар 6:0 ҳисобида ғалаба қозонди. Мьянма терма жамоаси билан учрашув ҳам Ўзбекистоннинг 4:0 ҳисобидаги ғалабаси билан якунланди.
Мусобақа 22–31 октябрь кунлари Бокуда бўлиб ўтмоқда. Унда 191 мамлакатнинг ўсмирлар терма жамоалари иштирок этмоқда. Жамоалар 32 гуруҳга бўлинган. Бу мазкур ёш тоифасидаги футболчилар ўртасида шу форматда ўтказилаётган илк жаҳон чемпионатидир.
