Ўзбекистон ташқи ишлар вазири Индонезия савдо вазири билан учрашув ўтказди

Тошкент, Ўзбекистон (UzDaily.uz) — 11 февраль куни икки томонлама ҳамкорлик доирасида Ўзбекистон Республикаси ташқи ишлар вазири Бахтиёр Саидов Индонезиянинг савдо вазири Буди Сантосо билан учрашув ўтказди.

Учрашувда икки мамлакатда амалга оширилаётган иқтисодий ислоҳотлар динамикаси муҳокама қилинди. Бу ислоҳотлар бозорларни кенгайтириш ва бизнес учун янги имкониятлар яратишда муҳим аҳамиятга эга экани таъкидланди.

Музокаралар чоғида томонлар савдо-иқтисодий алоқаларни фаоллаштириш, икки мамлакат ўртасидаги ҳамкорликда мавжуд салоҳиятдан тўлиқ фойдаланиш ҳамда Ўзбекистон ва Индонезия бизнес доиралари ўртасидаги ҳамкорликни мустаҳкамлаш масалаларига алоҳида эътибор қаратдилар.

Вазирлар мунтазам бизнес алмашинувларни қўллаб-қувватлаш, янги ҳамкорлик каналларини яратиш ва мавжудларини янада мустаҳкамлашга икки томонлама қизиқиш билдирдилар. Учрашув якунида ўзаро манфаатли ҳамкорликни янада ривожлантириш бўйича кейинги қадамлар белгилаб олинди.