Ўзбекистон Қозоғистонда ҳалок бўлган уч фуқаросининг жасадларини репатриация қилади

Тошкент, Ўзбекистон (UzDaily.uz) — Ўзбекистон Миграция агентлиги 11 сентябрь куни Қозоғистоннинг Олмаота вилоятидаги LGN Metal корхонасида содир бўлган ва уч нафар ўзбекистонликнинг ҳаётига зомин бўлган фожиага муносабат билдирди.

Идора маълумотига кўра, марҳумларнинг жасадларини Ватанга қайтариш учун зарур барча тартиб-таомиллар йўлга қўйилган.

Ҳалок бўлганларнинг оилаларига амалий ёрдам ва кўмак кўрсатиш учун Агентликнинг ҳудудий бўлинмалари масъул ходимлари бириктирилган.

Шунингдек, тергов жараёни доирасида Қозоғистон томони билан доимий ҳамкорлик йўлга қўйилгани таъкидланди. Миграция агентлиги марҳумларнинг яқинлари ва қариндошларига чуқур ҳамдардлик билдирди.

Фожиа юзасидан Илий тумани полицияси меҳнат муҳофазаси қоидаларини бузиш орқали одамлар ўлимига сабаб бўлган модда бўйича жиноят ишини қўзғатди, ҳозирда тергов ҳаракатлари олиб борилмоқда.