Олим Давлатов Ўзбекистон Президенти маслаҳатчиси этиб тайинланди
Тошкент, Ўзбекистон (UzDaily.uz) — Олим Давлатов Ўзбекистон Республикаси Президентининг вакиллик органлари, нодавлат нотижорат ташкилотлари ва ёшлар масалалари бўйича маслаҳатчиси этиб тайинланди. Тегишли фармонни Ўзбекистон Президенти имзолади.
Шу билан бирга, Русланбек Давлетов Президентнинг вакиллик органлари, нодавлат нотижорат ташкилотлари ва ёшлар масалалари бўйича маслаҳатчиси лавозимидан озод этилди.
Ҳар икки кадрлар бўйича қарор Ўзбекистон Республикаси Президентининг тегишли фармонлари билан расмийлаштирилди.
Олим Давлатов филология фанлари бўйича фалсафа доктори ҳисобланади. У 2022 йил апрелидан Республика Маънавият ва маърифат маркази ҳузуридаги Ижтимоий-маънавий тадқиқотлар институтига раҳбарлик қилиб келган. Бунга қадар у Алишер Навоий номидаги Халқаро жамоат фондини бошқарган.
Русланбек Давлетов аввал Президентнинг ижтимоий-сиёсий ривожланиш масалалари бўйича маслаҳатчиси лавозимида ишлаган. 2017–2022 йилларда у Ўзбекистон адлия вазири бўлган.
