Тошкент, Ўзбекистон (UzDaily.uz) — Ўзбекистонда 2026 йил ноябрь ойида муҳтож оилаларнинг ҳар бирига бир марталик 1 млн сўм миқдорида моддий ёрдам тўлаш режалаштирилмоқда. Ушбу ёрдам жами 1 млн 17 минг оилани қамраб олади.
Мазкур чора қиш мавсумида иситиш ва энергетика ресурслари учун харажатлар ортиши даврида хонадонларни қўллаб-қувватлашга қаратилган.
Шу билан бирга, ҳукумат марказлаштирилган иситиш тизимидан фойдаланадиган оилалар учун давлат ёрдамини олиш мезонларини кенгайтиришни режалаштирмоқда.
Моддий ёрдам олиш учун даромаднинг юқори чегарасини Тошкент шаҳрида меҳнатга ҳақ тўлашнинг энг кам миқдорининг (МҲТЭКМ) уч бараваригача, мамлакатнинг бошқа ҳудудларида эса икки бараваригача белгилаш таклиф этилмоқда.
Шунингдек, электр энергияси ва табиий газ учун компенсациялар амал қилиш муддатини 2028 йил 1 апрелга қадар узайтириш назарда тутилган.
Газлаштирилмаган ёки газ тармоқларига уланиш қийин бўлган ҳудудларда яшовчилар учун иситиш мавсумида электр энергияси истеъмолининг базавий меъёрини ошириш режалаштирилмоқда. Уни амалдаги 200 кВт·соатдан 350 кВт·соатгача кўтариш таклиф этилган.
Қўшимча чоралар турар жойларнинг энергия самарадорлигини оширишни ҳам қамраб олади. 2027–2028 йилларда яна 3 минг нафар муҳтож оиланинг яшаш шароитини яхшилаш режалаштирилмоқда.
Бунинг учун уйларни иссиқлик изоляцияси билан таъминлаш, энергия тежовчи технологияларни жорий этиш ва қайта тикланувчи энергия манбаларидан фойдаланиш бўйича ишлар амалга оширилади.
Ушбу чора-тадбирлар мажмуаси кам таъминланган оилаларнинг энергетика ресурслари учун харажатларини камайтириш, турар жойларнинг энергия самарадорлигини ошириш ва манзилли ижтимоий ёрдам қамровини кенгайтиришга қаратилган.
