Тошкент, Ўзбекистон (UzDaily.uz) — Ўзбекистон соғлиқни сақлаш вазири Элдор Адилов ва Қозоғистон соғлиқни сақлаш вазири Ақмарал Алназарова Авазда икки мамлакатнинг тиббиёт соҳасидаги ҳамкорлигини ривожлантиришнинг истиқболли йўналишларини муҳокама қилди. Бу ҳақда Ўзбекистон Соғлиқни сақлаш вазирлиги матбуот хизмати хабар берди.
Учрашув давомида томонлар икки томонлама ҳамкорликнинг турли йўналишларда, жумладан, соғлиқни сақлаш соҳасида изчил кенгайиб бораётганини таъкидлади. Тиббиёт соҳасида мутахассисларни тайёрлаш ва уларнинг малакасини ошириш, фармацевтика, бирламчи тиббий-санитария ёрдами, шунингдек, она ва бола саломатлигини муҳофаза қилиш йўналишларида ҳамкорлик аллақачон ривожланмоқда.
Элдор Адилов икки мамлакат ўртасидаги ҳамкорликни янада амалий босқичга олиб чиқишга қаратилган бир қатор ташаббусларни амалга оширишни таклиф қилди.
Таклифлардан бири Ўзбекистон ва Қозоғистоннинг етакчи тиббиёт муассасаларида 100 нафар шифокор учун қисқа муддатли стажировкаларни ташкил этишдан иборат бўлди. Дастурларни онкология, нейрохирургия, трансплантология, кардиохирургия ва педиатрия, шунингдек, бошқа мутахассисликлар бўйича ўтказиш режалаштирилмоқда.
Томонлар бирламчи тиббий-санитария ёрдами ва патронаж хизматини ривожлантириш масалаларига ҳам алоҳида эътибор қаратди. Ўзбекистон томони икки мамлакатнинг чегарадош ҳудудлари ўртасидаги ҳамкорликни мустаҳкамлаш, айрим дори воситаларига бўлган эҳтиёжни прогноз қилиш имкониятларини ўрганиш ва уларни ишлаб чиқаришни маҳаллийлаштириш масалаларини кўриб чиқишни ҳам таклиф қилди.
Белгиланган ҳар бир йўналиш бўйича аниқ чора-тадбирлар режаларини ишлаб чиқиш кўзда тутилган.
«Ҳамкорлигимиз ўтказилган учрашувлар ёки имзоланган меморандумлар сони билан эмас, балки аниқ натижалар билан баҳоланиши керак», — деди Элдор Адилов.
Ўз навбатида, Ақмарал Алназарова чегарадош ҳудудлардаги тиббиёт муассасалари ўртасидаги ҳамкорликни янада мустаҳкамлаш ва ўзаро тажриба алмашишни давом эттириш муҳимлигини таъкидлади.
Музокаралар якунида томонлар келгуси йилларда соғлиқни сақлаш соҳасидаги амалий ҳамкорликни ривожлантиришга қаратилган янги чора-тадбирлар режасини ишлаб чиқиш зарурлигини қайд этди.
